Pune News | पुण्यातील कोथरूड येथील एका व्यावसायिकाला स्वस्त मशिनरीचे आमिष दाखवून बिहारमधील (Bihar) पाटणा (Patna) येथे बोलावून, त्याचे अपहरण करून हत्या (Kidnapping and Murder) केल्याची खळबळजनक घटना उघडकीस आली आहे. लक्ष्मण साधू शिंदे (Laxman Sadhu Shinde) असे या ५५ वर्षीय व्यावसायिकाचे नाव असून, वेळीच ओळख पटली नसती तर त्यांचा मृतदेह बेवारस म्हणून जाळला जाण्याची शक्यता होती.
स्वस्त मशिनरीचे आमिष आणि अपहरण
कोथरूड येथील इंद्रायणी सोसायटीत राहणारे लक्ष्मण शिंदे यांना काही दिवसांपूर्वी ईमेलद्वारे संपर्क साधण्यात आला. कंपनीची टुल्स आणि मशिनरी स्वस्तात देण्याचे आमिष दाखवून त्यांना पाटण्याला बोलावण्यात आले. त्यानुसार, ११ एप्रिल रोजी सायंकाळी ते इंडिगो विमानाने (IndiGo flight) पाटणा विमानतळावर पोहोचले. विमानतळावरून ‘शिवराज सागी’ नावाच्या व्यक्तीने पाठवलेल्या गाडीतून ते झारखंडला (Jharkhand) जात असल्याचे त्यांनी पत्नीला फोनवरून सांगितले होते.
मात्र, त्याच रात्री साडेनऊनंतर त्यांचा मोबाईल बंद झाला. काही वेळाने दुसऱ्याच व्यक्तीने फोन उचलून ते बाथरूमला गेल्याचे सांगितले व नंतर फोन पुन्हा बंद झाला. दुसऱ्या दिवशी संपर्क न झाल्याने शिंदे यांच्या मेहुण्यांनी, विशाल लोखंडे (Vishal Lokhande) यांनी, पुण्यात अपहरणाची तक्रार दाखल केली. शिंदे यांचे शेवटचे मोबाईल लोकेशन नालंदा जिल्ह्यातील हिलसा (Hilsa, Nalanda) येथे आढळून आले.
मृतदेहाचा शोध आणि धक्कादायक वास्तव
पुणे पोलीस आणि शिंदे यांचे नातेवाईक पाटण्यात पोहोचले. पाटणा पोलिसांनी शिंदे यांचे फोटो आसपासच्या जिल्ह्यांमध्ये पाठवले. दरम्यान, १२ एप्रिल रोजी जहानाबाद (Jehanabad) जिल्ह्यातील घोसी पोलीस (Ghoshi Police) ठाण्याच्या हद्दीत एका रस्त्यावर अनोळखी मृतदेह पोलिसांना सापडला होता. ओळख न पटल्याने तो पोस्टमार्टेमसाठी पाठवण्यात आला होता.
पाटणा पोलिसांनी पाठवलेल्या फोटोवरून जहानाबाद पोलिसांनी संपर्क साधला आणि तो मृतदेह लक्ष्मण शिंदे यांचाच असल्याचे स्पष्ट झाले. खंडणी न मिळाल्याने अपहरणकर्त्यांनी गळा दाबून त्यांची हत्या केल्याचा प्राथमिक अंदाज आहे. जहानाबाद पोलीस हा मृतदेह बेवारस म्हणून अंत्यसंस्कार करण्याच्या तयारीत असतानाच ओळख पटल्याने पुढील अनर्थ टळला. सायबर गुन्हेगारांनी (Cyber criminals) पैशांसाठी हा गुन्हा केल्याचा संशय आहे.
