PM-KISAN Samman Nidhi | प्रधानमंत्री किसान सन्मान निधी योजनेचा २१ वा हप्ता मिळण्याच्या प्रतीक्षेत असलेल्या शेतकऱ्यांसाठी एक मोठी बातमी आहे. केंद्र सरकारने नियमांचे उल्लंघन करून योजनेचा लाभ घेणाऱ्या संशयित लाभार्थ्यांची एक मोठी यादी तयार केली असून, त्यांच्यावर कडक कारवाई करण्याची तयारी सुरू केली आहे, ज्यामुळे लाखो अपात्र शेतकरी सरकारी रडारवर आले आहेत.
सरकारच्या रडारवर ३१ लाख संशयित
केंद्र सरकारने केलेल्या तपासणीत असे आढळून आले आहे की, देशभरातील ३१ लाखांहून अधिक लोक पीएम किसान (PM Kisan) योजनेचा लाभ चुकीच्या पद्धतीने घेत आहेत. धक्कादायक बाब म्हणजे, यामध्ये एकाच कुटुंबातील पती आणि पत्नी दोघेही स्वतंत्रपणे योजनेचे लाभार्थी असल्याचे अनेक प्रकरणांमध्ये समोर आले आहे.
या गंभीर प्रकारानंतर, केंद्रीय कृषी मंत्रालयाने सर्व राज्य सरकारे आणि केंद्रशासित प्रदेशांना या संशयित प्रकरणांची कसून चौकशी करण्याचे आणि बोगस लाभार्थ्यांना यादीतून वगळण्याचे निर्देश दिले आहेत. मंत्रालयाने दिलेल्या माहितीनुसार, ३१ लाख संशयित प्रकरणांपैकी आतापर्यंत १९ लाखांची चौकशी पूर्ण झाली असून, त्यातील तब्बल ९४ टक्के प्रकरणांमध्ये पती-पत्नी दोघेही योजनेचा लाभ घेत असल्याचे निष्पन्न झाले आहे.
PM-KISAN Samman Nidhi | २१ व्या हप्त्यापूर्वी होणार मोठी कारवाई
पीएम किसान सन्मान निधीचा २१ वा हप्ता वितरीत करण्यापूर्वीच, सरकार या बोगस लाभार्थ्यांवर कारवाई करण्याच्या तयारीत आहे. फेब्रुवारी २०१९ मध्ये सुरू झालेल्या या योजनेअंतर्गत, पात्र शेतकरी कुटुंबांना दरवर्षी ६,००० रुपये तीन समान हप्त्यांमध्ये दिले जातात. आतापर्यंत ९.७ कोटींहून अधिक शेतकऱ्यांना २० हप्त्यांचा लाभ मिळाला आहे. याआधीही कृषी मंत्रालयाने जमिनीच्या चुकीच्या तपशिलामुळे ३३ लाख संशयित प्रकरणे शोधून काढली होती.
दरम्यान, पूरपरिस्थितीमुळे केंद्र सरकारने उत्तराखंड (Uttarakhand), हिमाचल प्रदेश (Himachal Pradesh), पंजाब (Punjab) आणि जम्मू-काश्मीरमधील (Jammu and Kashmir) शेतकऱ्यांच्या खात्यात २१ व्या हप्त्याची रक्कम वेळेपूर्वीच जमा केली आहे. इतर राज्यांमधील पात्र शेतकऱ्यांनाही लवकरच पुढील हप्ता दिला जाईल, मात्र त्यापूर्वी अपात्र लाभार्थ्यांची यादी वगळली जाणार आहे, हे निश्चित.
