Old Mumbai-Pune Highway | पुणे जिल्ह्यातील चाकण आणि तळेगाव औद्योगिक पट्ट्यातील वाढती वाहतूक कोंडी लक्षात घेता महाराष्ट्र औद्योगिक विकास महामंडळ (एमआयडीसी) ने मोठा निर्णय घेतला आहे. सुमारे 35 किलोमीटर लांबीचा पर्यायी रस्ता उभारण्याची योजना आखण्यात आली असून, या नव्या मार्गामुळे जुना मुंबई-पुणे महामार्ग थेट पुणे-नाशिक महामार्गाशी जोडला जाणार आहे. परिणामी औद्योगिक वाहतूक सुलभ होण्यासोबतच शहरातील कोंडीतही मोठी घट अपेक्षित आहे.
गेल्या काही वर्षांत चाकण आणि तळेगाव परिसरात औद्योगिकीकरण झपाट्याने वाढले आहे. उद्योगांच्या विस्तारामुळे दररोज हजारो जड वाहनांची ये-जा सुरू असते. त्यामुळे मुख्य रस्त्यांवर प्रचंड ताण निर्माण झाला होता. उद्योगांच्या वेळापत्रकावर तसेच स्थानिक नागरिकांच्या दैनंदिन प्रवासावर त्याचा परिणाम होत होता. या पार्श्वभूमीवर हा पर्यायी मार्ग महत्त्वाचा ठरणार आहे.
35 किमी पर्यायी मार्गाची रूपरेषा :
नवीन रस्ता जुन्या मुंबई-पुणे महामार्गावरून सुरू होऊन देहूरोडमार्गे तळेगाव औद्योगिक क्षेत्रात प्रवेश करणार आहे. पुढे नवलाख उंबरे गावाबाहेरून सुमारे 1.7 किमी लांबीचा सहापदरी काँक्रीट रस्ता टप्पा दोनशी जोडण्यात आला आहे. त्यानंतर ह्युंदाई चौक, चाकण टप्पा दोन व पाचमार्गे कॉर्निंग कंपनी परिसरातून हा मार्ग भामा नदीपर्यंत जाणार आहे.
भामा नदीपासून पुढे हा रस्ता थेट पुणे-नाशिक महामार्गाला जोडला जाईल. एकूण 35 किमी लांबीच्या या मार्गात काही ठिकाणी सहापदरी तर काही ठिकाणी चारपदरी काँक्रीट रस्त्यांची उभारणी केली जात आहे. त्यामुळे जड वाहनांची वाहतूक अधिक सुरक्षित आणि वेगवान होणार आहे.
Old Mumbai-Pune Highway | कोट्यवधींचा निधी आणि वेगवान काम :
या महत्त्वाच्या प्रकल्पासाठी मोठ्या प्रमाणावर निधी खर्च केला जात आहे. नवलाख उंबरे परिसरातील सहापदरी रस्त्यासाठी सुमारे 50 कोटी रुपये तर भामा नदीपर्यंतच्या 6.5 किमी मार्गासाठी सुमारे 105 कोटी रुपयांचा खर्च अपेक्षित आहे. मजबूत काँक्रीट रस्त्यांमुळे औद्योगिक मालवाहतुकीचा वेग वाढेल, असा विश्वास अधिकाऱ्यांनी व्यक्त केला आहे. (Old Mumbai-Pune Highway)
सध्या विविध टप्प्यांतील कामे वेगाने सुरू असून काही भाग पूर्णत्वाच्या मार्गावर आहेत. हा मार्ग लवकरात लवकर वाहतुकीसाठी खुला करण्याचे उद्दिष्ट आहे. पर्यायी रस्ता सुरू झाल्यानंतर तळेगाव-चाकण-शिक्रापूर मार्गावरील ताण कमी होईल आणि स्थानिक नागरिकांना वाहतूक कोंडीतून मोठा दिलासा मिळेल.
