नेपाळमध्ये सोशल मीडिया बंदीवरून उद्रेक, 5 आंदोलकांचा मृत्यू

On: September 8, 2025 4:20 PM

---Advertisement---

Nepal Protest Gen Z | नेपाळ सरकारने फेसबुक, ट्विटर (X), इंस्टाग्राम, यूट्यूबसह 26 सोशल मीडिया प्लॅटफॉर्मवर बंदी घालण्याचा निर्णय घेतल्यानंतर देशातील तरुणाई संतप्त झाली आहे. 3 सप्टेंबरपासून लागू झालेल्या या बंदीविरोधात आज हजारो तरुणांनी काठमांडूमध्ये संसद भवनाबाहेर मोठं आंदोलन छेडलं. सरकारच्या निर्णयामुळे नागरिकांच्या अभिव्यक्ती स्वातंत्र्यावर गदा येत असल्याची भावना तरुणांनी व्यक्त केली.

संसदेत घुसले आंदोलक :

हजारोंच्या संख्येने जमलेल्या निदर्शकांनी थेट संसद भवनाच्या गेट क्रमांक 1 आणि 2 वर कब्जा केला. यावेळी परिस्थिती बेकाबू झाल्याने पोलिसांनी लाठीमार, अश्रुधुराच्या नळकांड्या आणि पाण्याची फवारणी केली. संघर्षादरम्यान किमान 5 आंदोलकांचा मृत्यू झाल्याची माहिती समोर आली असून, शेकडो तरुण जखमी झाल्याची भीती व्यक्त होत आहे. (Nepal Protest Gen Z)

हिंसक निदर्शनांच्या पार्श्वभूमीवर काठमांडूमध्ये रात्री 10 वाजेपर्यंत कर्फ्यू लागू करण्यात आला आहे. यासोबतच राष्ट्रपती भवन, उपराष्ट्रपती भवन आणि पंतप्रधान निवासस्थानाजवळ सैन्य तैनात करण्यात आले आहे. पोलिसांच्या मते, सुमारे 12 हजार निदर्शक रस्त्यावर उतरले होते. परिस्थिती गंभीर होत असल्याने सरकारने आपत्कालीन सुरक्षा बैठक बोलावली आहे.

Nepal Protest Gen Z | सोशल मीडिया बॅन का झाला? :

नेपाळच्या दळणवळण आणि माहिती तंत्रज्ञान मंत्रालयाने सांगितले की, फेसबुक, इंस्टाग्राम, यूट्यूबसह अनेक प्लॅटफॉर्मने सरकारी नोंदणी प्रक्रिया पूर्ण केली नव्हती. त्यांना 28 ऑगस्ट ते 2 सप्टेंबरपर्यंतची मुदत देण्यात आली होती. मात्र अंतिम तारखेपर्यंत नोंदणी न केल्याने 26 सोशल मीडिया प्लॅटफॉर्मवर बंदी घालण्यात आली.