Neena Gupta | बॉलिवूड (Bollywood) आणि वेब सिरीज विश्वात आपल्या अभिनयाने ठसा उमटवणाऱ्या ज्येष्ठ अभिनेत्री नीना गुप्ता (Neena Gupta) या त्यांच्या स्पष्टवक्तेपणासाठी ओळखल्या जातात. नुकत्याच एका मुलाखतीत त्यांनी भारतीय समाजात आजही टॅबू मानल्या जाणाऱ्या ‘सेक्स’ (Sex) या विषयावर अत्यंत मोकळेपणाने आणि परखडपणे आपली मते मांडली. भारतातील बहुसंख्य महिलांना लैंगिक संबंधांमधील आनंदाची जाणीवच नसते, असे धक्कादायक विधान त्यांनी केले आहे.

सेक्स फक्त पुरुषांसाठी?

प्रसिद्ध युट्यूबर लिली सिंग (Lilly Singh) सोबत झालेल्या एका विशेष मुलाखतीत नीना गुप्ता यांनी त्यांच्या तरुणपणीच्या दिवसांची आठवण सांगितली, जेव्हा ‘सेक्स’ हा शब्द हळू आवाजात किंवा कुजबुजूनच बोलला जायचा. “आता मात्र काळ बदलला आहे. आता मी सेक्सबद्दल फुसफुसून बोलत नाही, कारण मला वाटते की हे खूपच सामान्य आहे,” असे त्या म्हणाल्या. मात्र, भारतीय महिलांबद्दल बोलताना त्यांनी चिंता व्यक्त केली. “मला भारतीय महिलांबद्दल खूप वाईट वाटते,” असे त्या म्हणाल्या.

त्यांना असे का वाटते, असे विचारले असता, नीना गुप्ता यांनी स्पष्ट केले की, “भारतातील ९५ टक्के महिलांना सेक्स हा फक्त पुरुषांना खूश करण्यासाठी (To please men) आणि मुलांना जन्म देण्यासाठी (Procreation) असतो, असेच वाटते. त्यांना हे माहीतही नाही की सेक्स त्यांच्या स्वतःच्या आनंदासाठीही (For enjoyment) असतो.” स्टुडिओमधील प्रेक्षकांकडे निर्देश करत त्या म्हणाल्या की, इथे उपस्थित असलेले लोक भारतात अल्पसंख्याक आहेत (जे या विषयावर खुलेपणाने बोलू शकतात), पण “बहुतेक महिलांसाठी, सेक्स ही आनंददायक गोष्ट नाही,” असे त्यांचे मत होते.

Neena Gupta  | वयाबद्दल गुप्तता

याच मुलाखतीत नीना गुप्ता यांना त्यांच्या वयाबद्दलही विचारण्यात आले. मात्र, त्यांनी आपले वय सांगण्यास स्पष्ट नकार दिला. यामागे व्यावसायिक कारणे असल्याचे त्यांनी सांगितले. “मी माझं वय कधीही उघड करणार नाही. कारण मी माझ्या वयापेक्षा खूपच लहान दिसते,” असे त्या म्हणाल्या.

त्यांनी पुढे सांगितले की, त्यांना आताही बऱ्याचदा त्यांच्या वयापेक्षा मोठ्या, म्हणजेच वृद्ध महिलांच्या भूमिका (Older roles) मिळत आहेत. “जर मी माझं खरं वय सांगितलं तर त्यानंतर मला कोणत्या भूमिका मिळतील हे मला ठाऊक नाही. त्यामुळे, व्यावसायिक कारणांमुळे मी माझं वय उघड करणार नाही,” असे त्यांनी स्पष्ट केले. त्यांच्या या वक्तव्यावरून वय आणि भूमिका मिळणे याचा इंडस्ट्रीतील संबंध दिसून येतो.

News Title- Neena Gupta Interview Sex Women Pleasure Age