Nagpur News | नागपूर जिल्ह्यातून एक अत्यंत हृदयद्रावक आणि धक्कादायक घटना समोर आली आहे. कुही तालुक्यातील सुरगाव शिवारातील एका जुन्या खदानीत बुडून एकाच कुटुंबातील (Family) पाच जणांचा मृत्यू झाला आहे. मृतांमध्ये दोन महिला आणि तीन मुलांचा समावेश आहे. ही घटना आत्महत्या आहे की दुर्घटना, याचा तपास पोलीस करत असून, या घटनेमुळे संपूर्ण परिसरात शोककळा पसरली आहे.
घटनेचा तपशील आणि मृतांची ओळख
मिळालेल्या माहितीनुसार, ही दुर्दैवी घटना कुही पोलीस ठाण्याच्या हद्दीतील पाचगाव पोलीस (Police) चौकीसमोरील भागात असलेल्या गर्ग खदानीत घडली. आज, सोमवार, १२ मे रोजी दुपारी या पाचही जणांचे मृतदेह खदानीतील पाण्यातून बाहेर काढण्यात आले.
मृतांची नावे रोशनी चंद्रकांत चौधरी, तिचा मुलगा मोहित चंद्रकांत चौधरी, मुलगी लक्ष्मी चंद्रकांत चौधरी, रोशनीची बहीण रज्जो राऊत आणि इतिराज अन्सारी अशी आहेत.
हे पाचही जण रविवार, ११ मे रोजी सुट्टीचा दिवस असल्याने त्या परिसरात फिरायला गेले होते. मात्र, रात्र झाली तरी ते घरी परतले नाहीत. त्यामुळे, त्यांच्या कुटुंबीयांनी ते बेपत्ता असल्याची तक्रार नागपूर शहरातील दोन वेगवेगळ्या पोलीस ठाण्यांत नोंदवली होती.
पोलीस या सर्वांचा शोध घेत असताना, त्यांना कुही तालुक्यातील त्या जुन्या खदानीचे लोकेशन मिळाले. पोलिसांनी तात्काळ घटनास्थळी धाव घेऊन शोधकार्य सुरू केले असता, खदानीतील पाण्यातून पाचही जणांचे मृतदेह बाहेर काढण्यात आले.
प्राथमिक अंदाजानुसार, हे सर्वजण खदानीच्या परिसरात फिरायला आले होते आणि पाण्याच्या खोलीचा अंदाज न आल्याने किंवा पाय घसरल्याने त्यांचा बुडून मृत्यू झाला असावा, अशी शक्यता व्यक्त केली जात आहे. तथापि, त्यांचा मृत्यू नेमका कसा झाला, याबद्दल कुही पोलीस अधिक तपास करत आहेत. एकाच कुटुंबातील पाच जणांचा अशा प्रकारे मृत्यू झाल्याने परिसरात हळहळ व्यक्त होत आहे.
Title : Nagpur: Five Of Family Found Dead In Quarry
