Ram Mandir Station Birth | मुंबईच्या (Mumbai) राम मंदिर (Ram Mandir) रेल्वे स्थानकावर नुकत्याच जन्मलेल्या एका नवजात बाळाची प्रकृती गंभीर असल्याची माहिती समोर आली आहे. एका तरुणाने वैद्यकीय मदतीशिवाय, व्हिडिओ कॉलवरील मार्गदर्शनाने महिलेची प्रसूती केली होती. मात्र, आता या बाळाच्या हृदयाला छिद्र असल्याचे निदान झाले असून, त्याच्यावर अतिदक्षता विभागात उपचार सुरू आहेत. (Ram Mandir Station Birth)
धावत्या लोकलमध्ये प्रसूती वेदना, स्टेशनवर तरुणाने केली मदत :
गुरुवारी मध्यरात्री सुमारे १२:४० वाजता एक गर्भवती महिला लोकल ट्रेनमधून प्रवास करत होती. प्रवासादरम्यानच तिला तीव्र प्रसूती वेदना सुरू झाल्या. महिलेची गंभीर स्थिती पाहून, विकास बेद्रे (Vikas Bedre) नावाच्या एका तरुणाने प्रसंगावधान दाखवत आपत्कालीन साखळी खेचली, ज्यामुळे लोकल राम मंदिर रेल्वे स्थानकावर थांबवण्यात आली.
विकासला वैद्यकीय पार्श्वभूमी नसतानाही, त्याने तात्काळ आपली डॉक्टर मैत्रीण देविका देशमुख (Dr. Devika Deshmukh) यांना व्हिडिओ कॉल केला. डॉ. देविका यांच्या मार्गदर्शनाखाली विकासने व्हिडिओ कॉलवर सांगितलेल्या प्रत्येक सूचनेचे पालन केले आणि त्या महिलेची यशस्वी प्रसूती स्थानकाच्या प्लॅटफॉर्मवरच केली. या धाडसी प्रयत्नानंतर महिलेने एका गोंडस बाळाला जन्म दिला.
Ram Mandir Station Birth | नवजात बाळाच्या हृदयाला छिद्र, प्रकृती चिंताजनक :
प्रसूती यशस्वी झाली असली तरी, या नवजात बाळाची प्रकृती सध्या चिंताजनक आहे. वैद्यकीय तपासणीत बाळाच्या हृदयाला छिद्र असल्याचे निदान झाले आहे. त्याच्यावर कपूर रुग्णालयातील (Kapoor Hospital) अतिदक्षता विभागात (ICU) तातडीने उपचार सुरू करण्यात आले आहेत.
बाळाच्या आईची प्रकृती स्थिर असल्याचे डॉक्टरांनी सांगितले आहे. मात्र, बाळाच्या हृदयातील दोषामुळे त्याची स्थिती गंभीर बनली आहे. रुग्णालयातील डॉक्टर बाळाच्या प्रकृतीवर बारकाईने लक्ष ठेवून आहेत.
