Ganeshotsav Special Trains | गणेशोत्सव 2025 साठी प्रवास नियोजन करणाऱ्यांसाठी मोठी खुशखबर आहे. भारतीय रेल्वेने यंदा गणेश भक्तांच्या गर्दीचा विचार करून तब्बल 380 स्पेशल गाड्या चालवण्याची घोषणा केली आहे. 27 ऑगस्ट ते 6 सप्टेंबर 2025 दरम्यान या गाड्या धावणार असून, स्थानिक (लोकल) सेवांचाही समावेश केल्याने मुंबई आणि कोकण दरम्यानचा प्रवास अधिक सुलभ होणार आहे. गेल्या दोन वर्षांच्या तुलनेत ही संख्या जास्त आहे—2024 मध्ये 358 तर 2023 मध्ये 305 विशेष गाड्या चालवल्या गेल्या होत्या. (Ganeshotsav Special Trains)
कोकण रेल्वे मार्गावर जाणाऱ्या या गाड्यांना प्रवाशांच्या सोयीसाठी महत्त्वाच्या स्थानकांवर थांबे देण्यात आले आहेत. कोलाड, मानगाव, वीर, खेड, चिपळूण, सावर्डा, संगमेश्वर रोड, रत्नागिरी, कणकवली, कुडाळ, सावंतवाडी रोड, मडगाव जंक्शन, कारवार आणि उडुपी अशा स्थानकांवरून गणेशभक्तांना सोयीस्कर प्रवासाची सुविधा मिळेल. आरक्षण, वेळापत्रक आणि तिकीटांची सविस्तर माहिती आयआरसीटीसीच्या वेबसाईटवर, रेल वन अॅपवर आणि रेल्वेच्या तिकीट खिडक्यांवर उपलब्ध आहे.
उत्सवकाळातील ‘गणपती स्पेशल’ची वाढ; प्रवास होणार अधिक सुलभ :
मुंबई–कोकण मार्गावर गणेशोत्सवाच्या काळात दरवर्षी प्रचंड गर्दी उसळते. यावर्षी 380 स्पेशल ट्रेनमुळे प्रवाशांना अधिक पर्याय मिळणार असून, आरक्षण न मिळाल्यास अनेकांना पर्यायी गाड्यांचा लाभ घेता येईल. विशेष म्हणजे स्थानिक सेवाही वाढवल्याने मुंबई महानगरातील आंतरशहरी प्रवास सुलभ होईल आणि लाँग-डिस्टन्स गाड्या पकडणे सोपे जाईल.
रेल्वे प्रशासनाने कोकणात जाणाऱ्या गाड्यांचे थांबे रणनीतीपूर्वक नियोजित केले आहेत. त्यामुळे गणेशस्थापनेपासून ते विसर्जनापर्यंतचा प्रवास तणावमुक्त होईल. गर्दीचे योग्य व्यवस्थापन, अतिरिक्त डबे आणि वेळेवर सुटणाऱ्या गाड्यांमुळे प्रवाशांचा प्रवास अनुभव अधिक आरामदायी होण्याची अपेक्षा आहे.
Ganeshotsav Special Trains | पनवेल–चिपळूणदरम्यान 6 अनारक्षित स्पेशल; वेळा आणि थांबे जाहीर :
कोकणातील वाढती गर्दी पाहता पनवेल–चिपळूण या लोकप्रिय सेक्शनवर अनारक्षित (General) विशेष गाड्यांची घोषणा करण्यात आली आहे. गाडी क्रमांक 01159 पनवेल–चिपळूण ही 5, 6 आणि 7 सप्टेंबर 2025 रोजी सायंकाळी 4:40 वाजता पनवेलहून सुटून रात्री 9:55 वाजता चिपळूणला पोहोचेल. परतीची गाडी 01160 चिपळूण–पनवेल ही त्याच तारखांना सकाळी 11:05 वाजता चिपळूणहून सुटून दुपारी 4:10 वाजता पनवेलला पोहोचेल. (Ganeshotsav Special Trains)
या गाड्यांना सोमटणे, आप्टा, जीते, पेण, कासु, नागोठणे, रोहा, कोलाड, इंदापूर, माणगाव, गोरेगाव रोड, वीर, सापे वामणे, करंजडी, विन्हेरे, दिवाणखवटी, कलंबणी बुद्रुक, खेड आणि अंजनी येथे थांबे दिले आहेत. अनारक्षित असल्यामुळे तिकीटविक्री प्रवासाच्या दिवशी संबंधित काउंटर आणि मोबाईल अॅपवर उपलब्ध असेल. प्रवाशांनी वेळेआधी स्टेशनवर पोहोचून गर्दी टाळण्याचे आवाहन करण्यात येत आहे.
