MSRTC Employee | महाराष्ट्र राज्य मार्ग परिवहन महामंडळाने (MSRTC – Maharashtra State Road Transport Corporation) आपल्या कर्मचाऱ्यांच्या बदल्यांसाठी आता पूर्णपणे ऑनलाइन प्रणाली लागू करण्याचा निर्णय घेतला आहे. यासाठी एक नवीन वेब पोर्टल विकसित करण्यात आले असून, सध्या त्याची चाचणी सुरू आहे. या नवीन पद्धतीमुळे बदली प्रक्रियेत अधिक पारदर्शकता येण्याची अपेक्षा आहे.
पारदर्शक बदली प्रक्रियेची गरज-
महामंडळात कार्यरत असलेल्या ८४ हजारांहून अधिक कर्मचारी आणि अधिकाऱ्यांच्या बदल्यांमध्ये, विशेषतः वार्षिक सर्वसाधारण बदल्यांच्या वेळी, कर्मचारी संघटना आणि विविध गटांकडून (MSRTC Employee) हस्तक्षेप होत असल्याच्या तक्रारी होत्या. पसंतीच्या ठिकाणी बदलीसाठी दबाव आणला जात असे, ज्यामुळे भ्रष्टाचाराचे आरोपही होत होते. या पार्श्वभूमीवर, बदली प्रक्रियेतील त्रुटी दूर करण्यासाठी आणि संपूर्ण प्रक्रिया सुलभ करण्यासाठी ऑनलाइन पोर्टलची निर्मिती करण्यात आली आहे. महामंडळाचे उपाध्यक्ष व व्यवस्थापकीय संचालक, डॉ. माधव कुसेकर (Dr. Madhav Kusekar) यांनी सांगितले की, ऑक्टोबर अखेरपर्यंत हे पोर्टल कार्यान्वित होऊन ऑनलाइन बदल्यांना सुरुवात होईल.
ऑनलाइन बदलीची कार्यपद्धत आणि व्याप्ती-
या ऑनलाइन (MSRTC Employee) प्रणालीद्वारे, कर्मचाऱ्यांना एका आगारातून दुसऱ्या आगारात किंवा एका विभागातून दुसऱ्या विभागात बदलीसाठी अर्ज करता येईल. राज्यभरातील एका प्रदेशातून दुसऱ्या प्रदेशात बदलीची प्रक्रिया देखील याच माध्यमातून होईल. बदल्या करताना विविध निकषांना (उदा. वैद्यकीय कारणे, बिंदूनामावली) प्राधान्य दिले जाईल आणि रिक्त पदे सेवाज्येष्ठतेनुसार संगणकीकृत पद्धतीने भरली जातील.
ही ऑनलाइन बदली प्रक्रिया महामंडळाच्या राज्यभरातील सर्व आस्थापनांना लागू असेल. यामध्ये २५२ आगार, ३१ विभाग, ३ कार्यशाळा आणि १ केंद्रीय प्रशिक्षण संस्थेचा समावेश आहे. भविष्यातील सर्व बदल्या याच ऑनलाइन पद्धतीने केल्या जातील, ज्यामुळे कर्मचाऱ्यांच्या तक्रारी कमी होऊन संपूर्ण प्रक्रियेत सुसूत्रता येईल, असा विश्वास व्यक्त केला जात आहे.
