Manisha Bidve | कळंब (Kalamb) येथील मनीषा बिडवे हत्येच्या प्रकरणात आता पोलिसांनी दोन्ही आरोपींना अटक करत तपासाचा वेग वाढवला आहे. या प्रकरणाला संतोष देशमुख (Santosh Deshmukh) खून प्रकरणाशी जोडण्याचे धागे उघड होत असून, मनीषा बिडवेचा गायब झालेला मोबाईल या प्रकरणात महत्त्वपूर्ण ठरू शकतो, असं पोलिसांचं मत आहे.
मनीषा बिडवेचा मोबाईल पोलिसांसाठी झाला केंद्रबिंदू-
या हत्येप्रकरणातील आरोपींविरोधात खुनाचा गुन्हा कळंब पोलिसांनी सोमवारी रात्री दाखल केला. पोलिसांनी केलेल्या तपासात, मनीषा बिडवे (Manisha Bidve) यांचा मोबाईल सध्या आरोपीकडे असल्याचा संशय व्यक्त करण्यात आला आहे.
या मोबाईलमध्ये काय माहिती दडली आहे आणि ती माहिती संतोष देशमुख यांच्याशी संबंधित आहे का, याचा तपास सध्या सुरू आहे. अंजली दमानिया (Anjali Damania) यांच्या आरोपानंतर या प्रकरणाला गंभीर वळण मिळालं असून, बिडवेंसंबंधीच्या संभाव्य क्लुप्त्या उघड करण्यासाठी पोलिस मोबाईल डेटा तपासत आहेत.
मृतदेह कळंबमधील एका कॉलनीत आढळल्यावर तात्काळ गुन्हा दाखल करत दोघांना अटक करण्यात आली. हे दोघेही आरोपी केज (Kej) तालुक्यातील रहिवासी असून, पोलिसांनी त्यापैकी एकाला कळंबपासून 10 किमी अंतरावर अटक केली. त्याचे नाव रामेश्वर उर्फ राम्या भोसले (Rameshwar alias Ramya Bhosale) असे आहे. पोलिसांनी त्याच्याकडून काही महत्त्वपूर्ण माहिती मिळवली असल्याचे सांगितले आहे.
संतोष देशमुख प्रकरणाशी मोबाईलचा संभाव्य संबंध-
या गुन्ह्याची महत्त्वाची दुवा म्हणजे मनीषा बिडवेचा (Manisha Bidve) मोबाईल. पोलिसांचा अंदाज आहे की, या मोबाईलमध्ये संतोष देशमुख यांच्याशी संबंधित माहिती असू शकते. पोलिस सूत्रांनी सांगितलं की, मनीषाला कळंबमध्ये आणण्यामागे देशमुख यांना खोट्या गुन्ह्यात अडकवण्याचा प्रयत्न असल्याचं तपासात आढळून आलं आहे. त्यामुळे या मोबाईलमध्ये देशमुख यांचं कळंब कनेक्शन अधोरेखित करणारे काही पुरावे आढळू शकतात.
या अनुषंगाने डीवायएसपी संजय पवार (DYSP Sanjay Pawar) यांनी सांगितलं की, सध्या मोबाईल डेटा, कॉल डिटेल्स आणि संदेश तपासून यातील संबंधित पुरावे गोळा करण्यात येत आहेत. संतोष देशमुख यांना अडकवण्यासाठी हा मोबाईल वापरण्याचा डाव होता का, याचा सखोल तपास सुरू आहे. या प्रकरणातील पुढील खुलासे लवकरच समोर येण्याची शक्यता आहे.
