MHADA Lottery | मुंबईतील सर्वसामान्य नागरिकांसाठी घराचे स्वप्न पूर्ण करणाऱ्या म्हाडाच्या (MHADA) 120 घरांच्या विक्री प्रक्रियेला अचानक ब्रेक लागला आहे. 5 फेब्रुवारी 2026 रोजी सकाळी 11 वाजता सुरू होणारी ‘प्रथम येईल त्यास प्रथम प्राधान्य’ (FCFS) योजना तांत्रिक अडचणींमुळे पुढे ढकलण्यात आली आहे. त्यामुळे अर्जदारांमध्ये नाराजी आणि उत्सुकता दोन्ही वाढल्या आहेत. (MHADA Lottery News)
या घरांसाठी ऑनलाइन अर्ज नोंदणी आणि माहिती पुस्तिका आज उपलब्ध होणार होती. मात्र म्हाडाच्या अधिकृत वेबसाइटवर तांत्रिक बिघाड झाल्याने ही प्रक्रिया वेळेत सुरू होऊ शकली नाही. परिणामी प्रशासनाने अर्ज प्रक्रिया तात्पुरती स्थगित करत नवीन तारीख जाहीर करण्याचा निर्णय घेतला आहे.
तांत्रिक अडचण नेमकी काय आहे? :
म्हाडाने 2 फेब्रुवारीला 120 घरांच्या विक्रीची जाहिरात प्रसिद्ध केली होती. त्यानुसार आज अर्ज नोंदणी सुरू होणार होती. मात्र वेबसाइटवरील तांत्रिक त्रुटींमुळे अर्जदारांना लॉगिन करून अर्ज भरता आले नाहीत. त्यामुळे म्हाडा प्रशासनाने संपूर्ण प्रणाली तपासून दुरुस्ती करण्यासाठी वेळ देण्याचा निर्णय घेतला आहे. (Mumbai MHADA Lottery)
या प्रक्रियेमुळे म्हाडा कार्यालयातही मोठ्या प्रमाणावर चौकशीसाठी गर्दी झाली होती. अनेक इच्छुक अर्जदारांनी सकाळपासून वेबसाइटवर प्रयत्न केले, पण नोंदणी शक्य न झाल्याने नाराजी व्यक्त केली जात आहे.
MHADA Lottery | नवीन तारीख कधी जाहीर होणार? :
म्हाडाने दिलेल्या माहितीनुसार, तांत्रिक समस्या दूर करण्याचे काम सुरू असून लवकरच नवीन तारीख, वेळ आणि संपूर्ण माहिती पुस्तिका अधिकृत संकेतस्थळावर प्रसिद्ध केली जाईल. अर्जदारांनी अफवांवर विश्वास न ठेवता फक्त म्हाडाच्या अधिकृत पोर्टलवरच अपडेट्स पाहाव्यात, असे आवाहन करण्यात आले आहे. (FCFS housing scheme)
ही योजना पारंपरिक लॉटरीऐवजी ‘प्रथम येईल त्यास प्रथम प्राधान्य’ या तत्त्वावर आधारित आहे. मुंबईतील विविध उपनगरांमध्ये ईडब्ल्यूएस, एलआयजी आणि एमआयजी गटासाठी उपलब्ध असलेली ही 120 घरे पूर्वी न विकलेली असून आता नव्या पद्धतीने विक्रीसाठी ठेवण्यात आली आहेत.
