Maharashtra weather update | राज्यात पावसाचा प्रभाव पूर्णपणे कमी झाला असून आता उष्ण आणि कोरड्या हवामानाची चाहूल लागली आहे. 17 फेब्रुवारी 2026 रोजी महाराष्ट्रात तापमानात वाढ होण्याचा अंदाज व्यक्त करण्यात आला आहे. कोकणपासून विदर्भापर्यंत विविध भागांत वेगवेगळ्या स्वरूपात उकाडा जाणवणार असून दुपारच्या वेळी उन्हाची तीव्रता अधिक असेल, असा इशारा हवामान विभागाने दिला आहे.
किनारपट्टीत दमटपणा, आंतरिक भागात कडक उन्हाळा :
हवामान खात्याच्या अंदाजानुसार 17 फेब्रुवारी रोजी राज्यात उष्ण व कोरडे वातावरण कायम राहील. मुंबई, ठाणे, नवी मुंबई आणि कोकण किनारपट्टी परिसरात कमाल तापमान 35 ते 36 अंश सेल्सिअस दरम्यान राहण्याची शक्यता आहे, तर किमान तापमान 23 ते 24 अंशांपर्यंत असेल. या भागांत आर्द्रतेमुळे दमट हवामानाचा त्रास अधिक जाणवेल. रायगड आणि सिंधुदुर्ग जिल्ह्यांतही उष्णतेची स्थिती कायम राहणार आहे. (Maharashtra weather update)
पश्चिम महाराष्ट्रात सकाळी 18 ते 20 अंश किमान तापमानामुळे हलका गारवा जाणवेल; मात्र दुपारी पारा 36 ते 37 अंशांपर्यंत वाढेल. संध्याकाळी तापमानात किंचित घट अपेक्षित आहे. मराठवाड्यात कमाल तापमान 37 ते 38 अंशांदरम्यान राहील आणि किमान तापमान 17 ते 19 अंश असेल. विदर्भात उष्णतेची तीव्रता सर्वाधिक राहण्याची शक्यता असून कमाल तापमान 38 ते 39 अंशांपर्यंत जाऊ शकते, तर किमान तापमान 19 ते 21 अंश राहील.
Maharashtra weather update | फेब्रुवारीत हिवाळ्याचा प्रभाव कमी :
फेब्रुवारी महिन्यातील बदलत्या हवामानामुळे पश्चिम आणि मध्य भारतात हिवाळ्याची पकड सैल होत चालली आहे. तापमानात हळूहळू वाढ होत असल्याने राज्यात उष्णतेची तीव्रता वाढते आहे. समुद्रकिनारी भागांत आर्द्रतेमुळे उकाडा अधिक जाणवेल, तर अंतर्ग त जिल्ह्यांत दुपारच्या सत्रात उन्हाचा चटका बसण्याची शक्यता आहे.
हवामान विभागाने स्पष्ट केले आहे की, राज्यभर आकाश बहुतांश स्वच्छ राहील आणि पावसाची कोणतीही शक्यता नाही. कालच्या तुलनेत कमाल तापमान सुमारे 1 अंशाने वाढू शकते, तर किमान तापमानात मोठा बदल अपेक्षित नाही. त्यामुळे दुपारी बाहेर पडताना नागरिकांनी योग्य ती खबरदारी घ्यावी, असा सल्ला देण्यात आला आहे. एकूणच 17 फेब्रुवारी रोजी संपूर्ण महाराष्ट्रात उष्ण आणि कोरडे हवामान राहणार असून दैनंदिन कामकाजावर मोठा परिणाम होणार नसल्याचे सांगण्यात आले आहे.
