karuna sharma | धनंजय मुंडे (Dhananjay Munde) प्रकरणात नवे वळण आलं असून करुणा शर्मा (Karuna Sharma) यांनी थेट २० कोटींच्या सौद्याचा गंभीर आरोप केला आहे. एका चित्रपटात कामाची ऑफर असूनही ती नाकारून पतीसोबत राहण्याचा निर्णय घेतला, मात्र त्याचवेळी तिच्याशी लग्न करणाऱ्याला २० कोटी रुपये देण्याचा प्रस्ताव मुंडे यांनी दिला होता, असा धक्कादायक खुलासा करुणा शर्मांनी केला आहे.
चित्रपट सोडून वैवाहिक नात्याचा पर्याय
करुणा शर्मा म्हणाल्या, “मला एका चित्रपटात भूमिका साकारण्याची संधी होती, पण मी ती नाकारली. मी पतीसोबतच राहावं, असं ठरवलं. माझा पती इतका वाईट नाही, पण त्याने आजूबाजूला दलाल मंडळी जमवली आहेत.” त्या पुढे म्हणाल्या की, “माझ्या नावावर काहीच नाही. मी आणि माझी मुलं सतत धमक्यांचा सामना करत आहोत.”
या वक्तव्यामुळे खळबळ उडाली असून, वैयक्तिक संघर्षाच्या पलीकडे हा मुद्दा राजकीय आणि सामाजिक पातळीवर चर्चेचा विषय ठरत आहे. विशेषतः २० कोटींच्या सौद्याचा उल्लेख, चित्रपट नाकारण्याचा निर्णय आणि त्यानंतर मिळणाऱ्या धमक्यांमुळे या प्रकरणाला वेगळीच धार मिळाली आहे.
पतीच्या वागणुकीवर टिप्पणी
“पती वाईट नाही, पण त्याने जे लोक आजूबाजूला ठेवलेत, त्यांच्यामुळे आमचं आयुष्य उद्ध्वस्त झालंय,” असं सांगत करुणा शर्मा यांनी थेट धनंजय मुंडे यांच्या व्यवस्थापनावर प्रश्नचिन्ह निर्माण केलं आहे.
त्यांनी स्पष्ट केलं की, “माझ्या नावावर काहीच नाही. आर्थिक, मानसिक आणि वैयक्तिक स्तरावर आम्हाला फक्त त्रासच दिला जातो.” यासोबतच त्यांनी सांगितलं की, लग्नाच्या नात्याला त्यांनी प्राधान्य दिलं, चित्रपटाची संधी सोडली, पण त्याबदल्यात फक्त संघर्ष आणि अपमान मिळतोय.
या साऱ्या पार्श्वभूमीवर आता न्यायालय काय निर्णय घेते आणि करुणा शर्मांचे आरोप कितपत सिद्ध होतात, याकडे सर्वांचं लक्ष लागलेलं आहे.
Title: Karuna Sharma Rejects Film Offer, Alleges ₹20 Cr Deal
