Shivaji Kardile Viral Video | अहिल्यानगर (Akluj) जिल्ह्याचे ज्येष्ठ नेते आणि आमदार शिवाजीराव कर्डिले (Shivajirao Kardile) यांच्या आकस्मिक निधनाने संपूर्ण महाराष्ट्र शोकाकुल झाला आहे. नियतीच्या मनात काय होते, याची कल्पना कोणालाच नव्हती, कारण निधनाच्या आदल्याच दिवशी, गुरुवारी, ते आपल्या मतदारसंघात विविध कार्यक्रमांमध्ये उत्साहाने सहभागी झाले होते. याच दौऱ्यातील त्यांचा एक फोटो आता सर्वांचे डोळे पाणावत आहे, ज्यात ते भाजप नेते सुजय विखे पाटील (Sujay Vikhe Patil) यांचा हात धरून पायऱ्या उतरताना दिसत आहेत.
कार्यकर्तांमध्ये उत्साह, पण नियतीच्या मनात वेगळेच :
आमदार कर्डिले यांचा गुरुवारी जिल्ह्यात अनेक ठिकाणी नियोजित दौरा होता. या दौऱ्यादरम्यान, विविध कार्यक्रमांना हजेरी लावत त्यांनी कार्यकर्त्यांच्या भेटीगाठी घेतल्या. मोठ्या आजारपणातून बरे झाल्यानंतरही लोकांमध्ये मिसळण्याची त्यांची धडपड पाहून कार्यकर्ते सुखावले होते. अनेक ठिकाणी त्यांचे गुलाबाच्या फुलांनी स्वागत करण्यात आले. कर्डिले आता पूर्णपणे बरे होऊन राजकारणात पुन्हा सक्रिय झाले आहेत, अशीच भावना सर्वत्र होती.
मात्र, आदल्या दिवशी लोकांमध्ये हसण्या-बोलण्यात रमलेला हा ‘जनतेचा नेता’ दुसऱ्या दिवशी सकाळी अचानक सर्वांना सोडून जाईल, याची कोणी कल्पनाही केली नव्हती. त्यांच्यासोबत अखेरच्या क्षणापर्यंत असलेले सुजय विखे पाटील यांनी अत्यंत भावनिक प्रतिक्रिया देताना सांगितले, “काल आम्ही तीन तास एकत्र होतो, हसत-खेळत गप्पा मारल्या. ते आज आपल्यात नाहीत, यावर अजूनही विश्वास बसत नाही.”
दूध व्यावसायिक ते ‘जनतेचा नेता’: कर्डिलेंचा प्रेरणादायी प्रवास :
शिवाजीराव कर्डिले हे केवळ एक आमदार नव्हते, तर ते सर्वसामान्य जनतेतून आलेले एक कणखर नेतृत्व होते. बुऱ्हानगर (Burhanagar) गावचे सरपंच म्हणून सुरू झालेला त्यांचा राजकीय प्रवास, सहा वेळा आमदारकी, राज्यमंत्रिपद आणि अहिल्यानगर जिल्हा सहकारी बँकेचे अध्यक्षपद भूषवण्यापर्यंत पोहोचला. डॉक्टरांनी विश्रांतीचा सल्ला देऊनही, ‘माणसातला माणूस’ असलेल्या कर्डिले यांनी जनतेच्या समस्यांनाच नेहमी प्राधान्य दिले आणि आपला ‘जनता दरबार’ अविरतपणे सुरूच ठेवला. (Shivaji Kardile Viral Video)
२०२४ च्या विधानसभा निवडणुकीत त्यांनी राष्ट्रवादी काँग्रेसचे उमेदवार प्राजक्त तनपुरे (Prajakt Tanpure) यांचा मोठ्या मताधिक्याने पराभव केला होता, ज्यामध्ये विखे पाटील कुटुंबीयांनी महत्त्वाची भूमिका बजावली होती. त्यांच्या निधनाने अहिल्यानगरच्या विकासासाठी तळमळीने काम करणारा आणि शेतकऱ्यांच्या प्रश्नांसाठी पोटतिडकीने लढणारा एक लोकप्रतिनिधी हरपल्याची भावना व्यक्त होत आहे. मुख्यमंत्री, उपमुख्यमंत्र्यांसह राज्याच्या राजकीय वर्तुळातील अनेक नेत्यांनी त्यांना भावपूर्ण श्रद्धांजली वाहिली आहे.
