India-Pakistan Conflict | भारत आणि पाकिस्तान यांच्यातील संघर्ष अधिक तीव्र झाला असून, भारताच्या ‘ऑपरेशन सिंदूर’ कारवाईनंतर संतप्त झालेल्या पाकिस्तानने गेल्या चोवीस तासांत दुसऱ्यांदा भारतावर हवाई हल्ला केल्याचे वृत्त आहे. या ताज्या हल्ल्यांमध्ये पाकिस्तानने प्रामुख्याने जम्मू-काश्मीर आणि राजस्थानमधील सीमावर्ती भागांना ड्रोन आणि क्षेपणास्त्रांद्वारे लक्ष्य केले. याशिवाय, जम्मू, पठाणकोट, जैसलमेर आणि पंजाबमधील होशियारपूर येथेही ड्रोनद्वारे हल्ले करण्यात आल्याची माहिती आहे.
पाकिस्तानचा पुन्हा हल्ला
या वाढत्या संघर्षाचा परिणाम हिमाचल प्रदेशातील धर्मशाला येथे सुरू असलेल्या प्रतिष्ठित आयपीएल क्रिकेट सामन्यावरही झाला. धर्मशाला येथे आज पंजाब किंग्ज आणि दिल्ली कॅपिटल्स यांच्यात सामना सुरू असताना, पंजाबच्या डावातील दहाव्या षटकात पाकिस्तानच्या हवाई हल्ल्याच्या पार्श्वभूमीवर खबरदारीचा उपाय म्हणून शहरात अचानक ब्लॅकआऊट करण्यात आला. यामुळे मैदानातील फ्लडलाईट्स बंद पडल्या आणि सामना तात्काळ थांबवावा लागला, ज्यामुळे क्रीडाप्रेमींमध्येही चिंतेचे वातावरण पसरले. पाकिस्तानकडून सीमेपलीकडून सातत्याने जोरदार हल्ले सुरू असल्याचे चित्र आहे.
भारतीय संरक्षण दलांनी पाकिस्तानच्या या आक्रमकतेला चोख प्रत्युत्तर दिले आहे. सीमेवर तैनात करण्यात आलेल्या एस-४०० एअर डिफेन्स सिस्टीम, तसेच एल-७० आणि शिल्का या विमानभेदी तोफांनी पाकिस्तानचा हल्ला प्रभावीपणे परतवून लावला आहे. जैसलमेर, पठाणकोट आणि कच्छच्या परिसरात पाकिस्तानने डागलेली क्षेपणास्त्रे भारतीय जवानांनी यशस्वीरित्या पाडली. आतापर्यंत भारतीय सैन्याने पाकिस्तानची एकूण आठ क्षेपणास्त्रे पाडल्याची माहिती समोर आली आहे. याबरोबरच, जम्मू, पठाणकोट, जैसलमेर आणि होशियारपूर येथे ड्रोन हल्ल्यांचा प्रयत्नही भारतीय संरक्षण यंत्रणांनी हाणून पाडला असून, अनेक पाकिस्तानी ड्रोन नष्ट करण्यात आले आहेत. जम्मू विमानतळ हे पाकिस्तानच्या मुख्य लक्ष्यांपैकी एक असल्याची शक्यता वर्तवण्यात येत आहे. उरी आणि पोखरण सेक्टरमध्ये दोन्ही देशांच्या सैन्यांमध्ये जोरदार गोळीबार सुरू असल्याचेही वृत्त आहे.
India-Pakistan Conflict | भारताने घेतला महत्त्वपूर्ण निर्णय
या गंभीर परिस्थितीच्या पार्श्वभूमीवर, संरक्षणमंत्री राजनाथ सिंह हे भारताच्या तिन्ही सैन्यदलांच्या प्रमुखांशी सातत्याने संपर्कात असून, त्यांच्यात उच्चस्तरीय चर्चा सुरू आहेत. पाकिस्तानने भारतातील नागरी वस्ती असलेल्या भागांना लक्ष्य केल्यामुळे आता प्रत्यक्ष युद्धालाच तोंड फुटल्याचे मानले जात असून, भारत या आक्रमणाला कसे प्रत्युत्तर देणार याकडे सर्वांचे लक्ष लागले आहे. देशाच्या सुरक्षेसाठी आवश्यक सर्व पावले उचलली जात असल्याचे संरक्षण विभागाकडून सांगण्यात येत आहे.
दरम्यान, भारत-पाकिस्तानमधील वाढता तणाव लक्षात घेता, महाराष्ट्रातही सतर्कतेचा इशारा देण्यात आला आहे. खबरदारीचा उपाय म्हणून मुंबई पोलीस दलातील कर्मचाऱ्यांच्या नवीन सुट्ट्या मंजूर करण्यावर तात्काळ बंदी घालण्यात आली आहे, जेणेकरून जास्तीत जास्त पोलीस बळ कायदा व सुव्यवस्था राखण्यासाठी उपलब्ध राहील. राष्ट्रीय सुरक्षेच्या दृष्टीने हा महत्त्वाचा निर्णय घेण्यात आला असून, नागरिकांनी अफवांवर विश्वास न ठेवता शांतता राखावी, असे आवाहनही करण्यात आले आहे.
