Gold Silver Price | गेल्या काही दिवसांत घसरणीच्या मार्गावर असलेल्या सोने आणि चांदीच्या किमतींनी आता पुन्हा उसळी घेतली आहे. आंतरराष्ट्रीय बाजारातील हालचालींचा परिणाम देशांतर्गत सराफा बाजारावर उमटू लागला असून, दरवाढीमुळे गुंतवणूकदार आणि ग्राहक दोघांचेही लक्ष या घडामोडीकडे वेधले गेले आहे.
आठवड्यात सोन्यात चार हजारांची भर :
मागील आठवड्यात सोन्याच्या दरात लक्षणीय घट झाली होती. त्यामुळे खरेदीसाठी अनुकूल वातावरण निर्माण झाले होते. मात्र हा दिलासा फार काळ टिकला नाही. आठवडाभरापूर्वी १० ग्रॅम सोन्याची किंमत १ लाख ५२ हजार ३०० रुपये इतकी नोंदवली गेली होती. त्यानंतर दरात सातत्याने वाढ होत आज २४ कॅरेट सोन्याचा भाव १ लाख ५६ हजार २८० रुपयांवर पोहोचला आहे. (Today Gold Silver Price)
याचा अर्थ अवघ्या काही दिवसांत सुमारे ४ हजार रुपयांची वाढ झाली आहे. जागतिक पातळीवरील आर्थिक घडामोडी, चलनातील बदल आणि गुंतवणूकदारांची मागणी यामुळे हा ट्रेंड दिसून येत असल्याचे बाजार विश्लेषकांचे मत आहे. आठवडाभरातील या वाढीमुळे पुन्हा एकदा सोन्याचे दर लाखांच्या पुढे गेले आहेत.
Gold Silver Price | चांदीत तब्बल १५ हजारांची उडी :
सोन्याबरोबरच चांदीच्या किमतींमध्येही मोठी वाढ झाली आहे. कालपर्यंत १ किलो चांदीचा दर २ लाख ५५ हजार रुपये होता. मात्र आज तो थेट २ लाख ७० हजार रुपयांवर पोहोचला आहे. म्हणजेच एका दिवसातच तब्बल १५ हजार रुपयांची वाढ नोंदवली गेली आहे. यानुसार १ ग्रॅम चांदीचा दर २५५ रुपयांवरून वाढून २७० रुपये झाला आहे.
भारतातील चांदीचे दर आंतरराष्ट्रीय बाजारातील किमतींवर अवलंबून असतात. त्याचबरोबर डॉलरच्या तुलनेत रुपयाची स्थितीही महत्त्वाची ठरते. रुपया कमजोर झाल्यास आणि जागतिक किमती स्थिर राहिल्यास देशांतर्गत चांदी आणखी महाग होऊ शकते. दरातील हजारोंच्या चढ-उतारामुळे गुंतवणूकदारांमध्ये संभ्रम निर्माण झाला आहे.
सध्याच्या परिस्थितीत लगेच गुंतवणूक करावी की पुढील घसरणीची प्रतीक्षा करावी, याबाबत अनेक जण साशंक आहेत. तज्ज्ञांच्या मते, जागतिक बाजारातील अस्थिरता कायम राहिल्यास येत्या काळातही सोने-चांदीच्या दरात चढ-उतार सुरू राहण्याची शक्यता नाकारता येत नाही.
