Gautami Patil Car Accident | पुण्यातील नवले पूलावर 30 सप्टेंबर रोजी नृत्यांगना गौतमी पाटील हिच्या मालकीच्या कारने एका रिक्षाला जोरदार धडक दिली होती. या भीषण अपघातात रिक्षाचालक सामाजी विठ्ठल मरगळे हे गंभीर जखमी झाले. अपघात झाला तेव्हा गौतमी पाटील कारमध्ये नव्हती, मात्र रिक्षाचालकाच्या नातेवाईकांनी गौतमी पाटीलला (Gautami Patil Arrest) अटक करून तिच्यावर कठोर कारवाई करण्याची मागणी लावून धरली आहे.
टोईंग व्हॅन कोणी आणली?
पुणे पोलिसांनी या अपघात प्रकरणात गौतमी पाटील हिला शुक्रवारी नोटीस धाडली होती. त्यानंतर आता याप्रकरणाच्या चौकशीसाठी एका विशेष पोलीस अधिकाऱ्याची नियुक्ती करण्यात आली आहे. हा अपघात झाल्यानंतर गौतमी पाटील हिची कार टोईंग व्हॅन आणून घटनास्थळावरुन नेण्यात आली. ही टोईंग व्हॅन कोणी आणली होती, याचा तपास सध्या पोलिसांकडून सुरु आहे. त्यासाठी या परिसरातील सगळे सीसीटीव्ही तपासले जात आहेत.
गौतमी पाटील ही सेलिब्रिटी असल्याने तिच्याविरुद्ध कारवाई करताना चालढकल केली जात आहे, असा आरोप रिक्षाचालकाच्या नातेवाईकांनी केला होता. (Gautami Patil Car accident)
आमदार चंद्रकांत पाटील (Chandrakant Patil) यांनीही याप्रकरणात तातडीने कारवाई करण्याच्या सूचना पुणे पोलिसांना (Pune Police) दिल्या होत्या. यानंतर पुणे पोलिसांच्या कारवाईला वेग आला आहे. त्यामुळे गौतमी पाटील अडचणीत सापडण्याची शक्यता आहे. (Pune Crime news)
Gautami Patil Car Accident | अपघातानंतर कारचा ड्रायव्हर बदलला?
गौतमी पाटीलच्या अटकेसाठी शुक्रवारी रिक्षाचालकाच्या नातेवाईकांनी सिंहगड पोलीस ठाण्याबाहेर ठिय्या आंदोलन केले. रिक्षाचालक 30 सप्टेंबरला पहाटे पाच वाजता पॅसेंजरची वाट पाहत रस्त्याच्या कडेला उभा होता. त्यावेळी मागून एक कार आली आणि त्याला ठोकून निघून गेली. ही धडक इतकी जोरदार होती की, रिक्षा तीनवेळा पलटी झाली. या अपघातानंतर ज्या कारने धडक दिली, त्यामधील लोक खाली उतरले आणि निघून गेले.
मात्र, अर्धा तासाने एक व्यक्ती पुन्हा आला आणि त्याने त्याच्यासोबत टोईंग व्हॅन आणली होती. टोईंग व्हॅनच्या क्रेनने गौतमी पाटीलची कार टो करुन घटनास्थळावरुन नेण्यात आली. मात्र, आमचा भाऊ जखमी अवस्थेत तसाच रस्त्यावर पडून होता. रिक्षावाल्यांनी वेळीच मदत केली म्हणून आमच्या भावाचा जीव वाचला, असा आरोप रिक्षाचालकाच्या नातेवाईकांनी केला आहे. (Gautami Patil Car accident)
