Farmer | अमरावती (Amravati) येथील विमानतळ लोकार्पणानंतर विदर्भातील (Vidarbha) प्रकल्पग्रस्त शेतकऱ्यांना सानुग्रह अनुदान वाटप कार्यक्रमात बोलताना उपमुख्यमंत्री देवेंद्र फडणवीस (Deputy CM Devendra Fadnavis) यांनी शेतकऱ्यांना भावनिक साद घातली. जमीन संपादनाची घोषणा होताच काही धनदांडगे लोक शेतकऱ्यांकडून स्वस्तात जमिनी घेऊन नंतर मोठा नफा कमावतात, त्यामुळे शेतकऱ्यांनी सावध राहावे आणि आपली जमीन विकू नये, असे आवाहन त्यांनी केले.
‘शेतकऱ्यांनो, दलाल आणि धन्नाशेठपासून सावध रहा’
फडणवीस म्हणाले, “आम्ही जमीन अधिग्रहणाची घोषणा केली की कोणीतरी धन्नाशेठ (rich person) येतो आणि शेतकऱ्यांकडून जमिनी विकत घेतो व नंतर पाचपट पैसे कमावतो. त्यामुळे ज्या ठिकाणी जमीन अधिग्रहण होणार आहे, तेथील जमिनी विकू नका.” कोणी अचानक जमीन विकत घेत असेल, तर तो का घेत आहे, याची माहिती घ्या, कारण जमिनीचा योग्य मोबदला शेतकऱ्यालाच मिळावा, व्यापाऱ्याला नाही, अशी आमची भूमिका असल्याचे त्यांनी स्पष्ट केले.
“आता कायदा असा आहे की, कोणतेही सरकार आले तरी शेतकऱ्यांना योग्य मोबदला मिळेल. प्रकल्पग्रस्त शेतकऱ्यांचे पैसे कोणीही अडवू शकणार नाही. काही अडचण आल्यास थेट शासकीय कार्यालयात संपर्क साधा, पण दलालांच्या फंदात पडू नका,” असा सल्लाही फडणवीस यांनी दिला. त्यांनी समृद्धी महामार्ग (Samruddhi Mahamarg) शेतकऱ्यांसाठी जीवनदायिनी ठरल्याचेही नमूद केले.
शेतकऱ्यांवरील अन्याय दूर केला
२००६ ते २०१३ या काळातील काँग्रेस (Congress) सरकारवर टीका करताना फडणवीस म्हणाले की, तेव्हा शेतकऱ्यांची फसवणूक करून त्यांचे हक्क कमी मोबदल्यात गोठवण्यात आले. आपण मुख्यमंत्री झाल्यावर थेट खरेदीसाठी जास्त मोबदला देण्याचा जीआर काढला. २०२२ मध्ये महायुतीचे सरकार आल्यानंतर आमदार प्रताप अडसड (MLA Pratap Adsads) यांच्या पाठपुराव्याने आणि कायदेशीर बाबी तपासून या शेतकऱ्यांना सानुग्रह अनुदान देण्याचा निर्णय घेतला.
“विदर्भातील शेतकऱ्यांवर नेहमी अन्याय का व्हावा? आम्ही कायदा बदलून न्याय देण्याचे काम केले आहे,” असे ते म्हणाले. अनुदानाचे धनादेश देताना शेतकऱ्यांच्या डोळ्यात पाणी आले, ती भावना महत्त्वाची असल्याचे त्यांनी सांगितले. प्रकल्पग्रस्त शेतकऱ्यांच्या मुलांसाठी कर्ज योजना आणण्याचा प्रयत्न सुरू असल्याचेही त्यांनी नमूद केले.
Title : Fadnavis Urges Farmers Not to Sell Land Amid Acquisition, Warns Against Middlemen
