Dwarkanath Sanzgiri | ज्येष्ठ क्रिकेट समीक्षक, लेखक आणि सूत्रसंचालक द्वारकानाथ संझगिरी (Dwarkanath Sanzgiri) यांचे दीर्घ आजाराने निधन झाले. ते 74 वर्षांचे होते. मुंबईतील लीलावती रुग्णालयात त्यांनी अखेरचा श्वास घेतला. त्यांच्या निधनाने क्रिकेट आणि साहित्य क्षेत्राला मोठी हानी झाली असून, त्यांच्या आठवणींना उजाळा देत अनेक दिग्गजांनी श्रद्धांजली अर्पण केली आहे.
क्रिकेट आणि साहित्य विश्वातील अढळ नावलौकिक
संझगिरी यांनी मराठी भाषेत क्रिकेट लेखनाच्या माध्यमातून क्रिकेटप्रेमींना वेगळ्या शैलीत हा खेळ समजावून सांगितला. त्यांचे हलक्याफुलक्या शैलीतील लेखन आणि समालोचन चाहत्यांना नेहमीच भावत राहिले. सिव्हिल इंजिनियरिंगचे शिक्षण घेतलेल्या संझगिरी यांनी मुंबई महापालिकेत उच्च पदावर काम केले, मात्र क्रिकेटवरील प्रेम आणि लेखनकौशल्यामुळे ते लोकप्रिय समीक्षक झाले.
संझगिरी यांच्या निधनावर प्रसिद्ध समालोचक हर्षा भोगले यांनी एक्स वर लिहिले, “38 वर्षांचा मित्र, लेखनाची समृद्ध शैली आणि क्रिकेटचे अनोखे दर्शन घडवणारा एक उत्तम लेखक हरपला.” तसेच परिवहन मंत्री प्रताप सरनाईक यांनी ट्विट करून श्रद्धांजली अर्पण केली आहे.
सचिन तेंडुलकर आणि Dwarkanath Sanzgiri यांचे नाते
क्रिकेटच्या अनेक दिग्गजांसोबत संझगिरी यांचा जवळचा संबंध होता. विशेषतः मास्टर ब्लास्टर सचिन तेंडुलकर (Sachin Tendulkar) यांच्याशी त्यांचे विशेष स्नेहसंबंध होते. 1990 च्या इंग्लंड दौऱ्यापूर्वी सचिन आपल्या भावांसोबत संझगिरी यांच्या घरी गेला होता. त्यावेळी त्यांनी मिळून केलेला मेदू वडा, शिरा आणि चहा यांचा नाश्ता आजही सचिनच्या आठवणीत आहे.
संझगिरी यांच्या निधनानंतर उद्या (बुधवार) दुपारी 12 वाजता मुंबईच्या शिवाजी पार्क स्मशानभूमीत त्यांच्या पार्थिवावर अंतिम संस्कार केले जाणार आहेत. त्यांच्या जाण्याने मराठी क्रिकेट समीक्षणाच्या क्षेत्रात एक मोठी पोकळी निर्माण झाली आहे.
