Education Department | राज्यभरातील शाळांमध्ये ‘क्लास बंक’ करणाऱ्या विद्यार्थ्यांना आणि त्यांच्या पालकांना आता धक्का बसणार आहे. शालेय शिक्षण विभागाने विद्यार्थ्यांची उपस्थिती सुधारण्यासाठी एक मोठा आणि निर्णायक पाऊल उचलले आहे. येत्या शैक्षणिक वर्षापासून राज्यातील सर्व शाळांमध्ये दिवसातून तीन वेळा हजेरी घेणे बंधनकारक करण्यात आले असून, गैरहजर विद्यार्थ्यांची माहिती थेट पालकांच्या मोबाईलवर मेसेजद्वारे पाठवण्यात येणार आहे. यामुळे विद्यार्थ्यांच्या उपस्थितीत लक्षणीय सुधारणा होण्याची अपेक्षा आहे.
शिक्षण विभागाचा महत्त्वाचा निर्णय
या नवीन नियमानुसार, पहिली हजेरी सकाळी, दुसरी दुपारी आणि तिसरी सुटीच्या आधी घेतली जाणार आहे. या योजनेअंतर्गत शाळांना डिजिटल हजेरी प्रणाली लागू करावी लागणार असून, शिक्षकांना यासाठी विशेष प्रशिक्षण दिले जाणार आहे. या निर्णयामागील उद्दिष्ट स्पष्ट आहे: विद्यार्थ्यांच्या उपस्थितीत वाढ करणे, गैरहजेरी रोखणे आणि शिक्षणाची गुणवत्ता सुधारणे. शिक्षण विभागाने सांगितले की, पालकांपर्यंत थेट माहिती पोहोचल्याने विद्यार्थ्यांची जबाबदारी आणि शाळेतील शिस्त वाढेल.
या निर्णयामुळे विद्यार्थ्यांची उपस्थिती सुधारण्यास नक्कीच मदत होईल, अशी अपेक्षा व्यक्त केली जात आहे. विद्यार्थ्यांची गैरहजेरी ही शिक्षणातील एक मोठी समस्या आहे, ज्यामुळे त्यांच्या प्रगतीवर परिणाम होतो. पालकांना वेळेत माहिती मिळाल्यास, ते आपल्या पाल्याच्या उपस्थितीकडे अधिक लक्ष देऊ शकतील.
शिक्षक रडारवर
मात्र, शिक्षण क्षेत्रातील जाणकारांचे मत आहे की, ग्रामीण भागातील शाळांमधून “हजेरी लावून शिक्षकच गायब” असा प्रकार सातत्याने समोर येत असतो. त्यामुळे विद्यार्थ्यांप्रमाणेच शिक्षकांच्या हजेरीवरही लक्ष ठेवण्याची आवश्यकता आहे. जर शिक्षकांची उपस्थितीच नियमित नसेल, तर या नवीन प्रणालीचा पूर्ण उद्देश साध्य होणार नाही.
या नव्या योजनेमुळे विद्यार्थी आणि पालक दोघांनाही जागरूक व्हावे, आणि शिक्षणाची गुणवत्ता खऱ्या अर्थाने उंचावावी, अशी अपेक्षा व्यक्त केली जात आहे. शिक्षण विभागाने घेतलेला हा निर्णय विद्यार्थ्यांच्या भविष्यासाठी महत्त्वाचा ठरू शकतो, परंतु त्याची अंमलबजावणी प्रभावीपणे होणे आवश्यक आहे.
