Dr. Sampada Munde | सातारा (Satara) जिल्ह्यातील फलटण (Phaltan) येथील डॉ. संपदा मुंडे (Dr. Sampada Munde) यांच्या आत्महत्येने खळबळ उडाली असून, या प्रकरणात आता कुटुंबीयांनी गंभीर आरोप केले आहेत. पोलिसांकडून तपासात दिरंगाई होत असल्याचा आणि राजकीय दबाव असल्याचा संशय व्यक्त करत, जोपर्यंत आरोपींना अटक होत नाही, तोपर्यंत मृतदेह ताब्यात घेणार नसल्याचा इशारा कुटुंबीयांनी दिला आहे.
तपासातील विलंब आणि राजकीय हस्तक्षेपाचा संशय-
डॉ. संपदा मुंडे यांनी हॉटेलमध्ये आत्महत्या केल्यानंतर त्यांचे कुटुंबीय घटनास्थळी दाखल झाले. मात्र, कुटुंबीयांच्या म्हणण्यानुसार, घटनेनंतर एफआयआर (FIR) दाखल करण्यासाठी पोलिसांना ४ ते ५ तास लागले. इतकेच नाही, तर शवविच्छेदनासाठीही (Post-mortem) ३ ते ४ तास उलटून गेले तरी वैद्यकीय अधिकारी आले नव्हते, ज्यामुळे तपासाच्या हेतूवरच प्रश्नचिन्ह निर्माण झाले आहे.
या संपूर्ण दिरंगाईमागे राजकीय दबाव असल्याचा गंभीर आरोप कुटुंबीयांनी केला आहे. पोलीस आरोपींना वाचवण्याचा प्रयत्न करत असल्याचा संशय त्यांनी व्यक्त केला आहे. डॉ. मुंडे यांनी मृत्यूपूर्वी हातावर लिहिलेल्या सुसाईड नोटमध्ये पोलीस निरीक्षक गोपाल बदने (PSI Gopal Badne) आणि पोलीस प्रशांत बनकर (Police Prashant Bankar) यांच्यावर अत्याचार आणि छळाचे आरोप केले होते, त्यामुळे या दिरंगाईकडे अधिक संशयाने पाहिले जात आहे.
खासदाराच्या स्वीय सचिवावर दबाव आणल्याचा आरोप-
डॉ. मुंडे यांच्या कुटुंबीयांनी आणखी एक गंभीर आरोप केला आहे. डॉ. मुंडे यांनी पूर्वी दिलेल्या एका अर्जात एका खासदाराच्या (MP) स्वीय सचिवाचा (PA) उल्लेख होता. हा पीए फोनवरून अनेकदा स्वतः खासदार बोलत असल्याचे भासवून, वैद्यकीय अहवाल बदलण्यासाठी डॉ. मुंडे यांच्यावर दबाव आणत होता, असे कुटुंबीयांचे म्हणणे आहे.
कुटुंबीयांनी एसपी दर्जाचे अधिकारी महाडिक (Mahadik), बदने आणि बनकर यांची नावे घेत, पोलीस यंत्रणा आरोपींची बाजू घेत असल्याचा आरोप केला. “यात निश्चित काहीतरी गौडबंगाल असल्याने पोलिसांची बाजू घेण्याचा प्रयत्न केला जात आहे. राजकीय पातळीवर गोंधळ होऊ नये म्हणून हे प्रकार केले जात आहेत,” असा अंदाज कुटुंबीयांनी व्यक्त केला आहे. जोपर्यंत आरोपींना अटक होत नाही, तोपर्यंत मृतदेह ताब्यात न घेण्याचा पवित्रा त्यांनी घेतला आहे, ज्यामुळे प्रशासनावरील दबाव वाढला आहे.
