Anjali Damania | राज्याचे माजी मंत्री धनंजय मुंडे यांच्याशी संबंधित आणि जमीन व्यवहारांच्या आरोपांमुळे चर्चेत असलेले व्यावसायिक राजेंद्र घनवट (Rajendra Ghanwat) यांच्या पत्नी मनाली घनवट (Manali Ghanwat) यांचे पुण्यातील (Pune) रुग्णालयात उपचारादरम्यान निधन झाले. मात्र, हा मृत्यू नैसर्गिक नसून त्यामागे घातपात किंवा आत्महत्या असल्याचा गंभीर संशय ज्येष्ठ सामाजिक कार्यकर्त्या अंजली दमानिया (Anjali Damania) यांनी व्यक्त केला आहे. रुग्णालयात आणणाऱ्या व्यक्तींनी दिलेल्या माहितीचा हवाला देत दमानिया यांनी काही खळबळजनक दावे केले असून, यामुळे प्रकरणाला वेगळे वळण लागले आहे.
मृत्यूबाबत संशय आणि दमानियांचा दावा
माजी मंत्री धनंजय मुंडे (Dhananjay Munde) यांचे निकटवर्तीय मानले जाणारे आणि शेतकऱ्यांच्या जमिनी लाटल्याचा आरोप असलेले राजेंद्र घनवट यांच्या ४६ वर्षीय पत्नी मनाली घनवट यांची प्रकृती बिघडल्याने त्यांना पुण्यातील ज्युपिटर रुग्णालयात (Jupiter Hospital) दाखल करण्यात आले होते, जिथे उपचारादरम्यान त्यांचा मृत्यू झाला. या घटनेनंतर अंजली दमानिया यांनी मंगळवारी प्रसारमाध्यमांशी बोलताना सांगितले की, हा मृत्यू नैसर्गिक भासवण्याचा प्रयत्न होत असला तरी, त्यांना याबाबत संशय आहे.
अंजली दमानिया पुढे म्हणाल्या की, “मला मनाली घनवट यांच्या मृत्यूविषयी रात्री उशिरा माहिती मिळाली. जेव्हा त्यांना ज्युपिटर रुग्णालयात दाखल करण्यात आले, तेव्हा त्यांना घेऊन गेलेल्या काही लोकांनी अशी माहिती दिली की, मनाली यांच्या हातामध्ये गोळ्यांचे एक पाकीट (स्ट्रीप) होते आणि त्या पाकिटातील काही गोळ्या कमी झालेल्या होत्या.” या माहितीमुळे मृत्यूबाबत संशय अधिक गडद झाल्याने आपण तात्काळ शवविच्छेदनाची (postmortem) मागणी केली होती, असे दमानिया यांनी स्पष्ट केले. त्यानुसार, मनाली घनवट यांचे शवविच्छेदन करण्यात आले असून, पुढील तपासणीसाठी व्हिसेरा ससून रुग्णालयात (Sassoon Hospital) पाठवण्यात आला आहे. या व्हिसेरा तपासणीचा अहवाल आल्यानंतरच मृत्यूचे नेमके कारण स्पष्ट होईल, असेही त्यांनी नमूद केले.
पंकजा मुंडे यांच्या वक्तव्यावर टीका आणि मुंडेंचा परदेश दौरा
या प्रकरणावर बोलताना अंजली दमानिया यांनी सध्याच्या मंत्री पंकजा मुंडे (Pankaja Munde) यांच्या एका वक्तव्यावरही तीव्र नाराजी व्यक्त केली. पंकजा मुंडे यांनी बीडमधील गुन्हेगारीवर बोलताना ‘अशा घटना सगळीकडे घडतात, जालन्यातही घडतात’ असे म्हटले होते. यावर प्रतिक्रिया देताना दमानिया म्हणाल्या की, “इतर ठिकाणी घडणाऱ्या घटना आणि बीडमधील (Beed) परिस्थिती यात फरक आहे. बीडमध्ये एका नेत्याने (धनंजय मुंडेंकडे रोख) कराडसारख्या (Karad) गुंडांना पोसले आहे. ही संघटित गुन्हेगारी (गँग वॉर) आहे. या टोळीच्या विरोधात कोणी बोलले तर त्याची हत्या होते. अशा घटना सर्रास सगळीकडे घडत नाहीत.”
या सर्व घडामोडी घडत असताना, ज्यांच्यावर अनेक आरोप होत आहेत ते माजी मंत्री धनंजय मुंडे हे सध्या देशाबाहेर असल्याची माहिती समोर आली आहे. सूत्रांनी दिलेल्या माहितीनुसार, धनंजय मुंडे हे आपल्या कुटुंबासमवेत सोमवारी रात्री आठ दिवसांच्या परदेश दौऱ्यासाठी केनियाला (Kenya) रवाना झाले आहेत.
Title : Anjali Damania Claims Pills Found With Deceased
