Ajit Pawar | पुण्याच्या (Pune) चाकण येथील औद्योगिक वसाहतीत निबे लिमिटेड मिसाईल्स कॉम्प्लेक्स अँड प्रिसिजन मशीनिंगच्या अत्याधुनिक मिसाईल्स आणि स्मॉल आर्म्स कॉम्प्लेक्सचे उद्घाटन आज पार पडले. या कार्यक्रमाला मुख्यमंत्री देवेंद्र फडणवीस (Devendra Fadnavis), उपमुख्यमंत्री अजित पवार (Ajit Pawar), जलसंपदा मंत्री राधाकृष्ण विखे पाटील (Radhakrishna Vikhe Patil) आणि उद्योगमंत्री उदय सामंत (Uday Samant) उपस्थित होते. उद्घाटनाच्या वेळी मुख्यमंत्री आणि उपमुख्यमंत्र्यांनी स्टेन गन हातात घेतल्याचे पाहायला मिळाले. यावेळी अजित पवार यांनी मिश्कीलपणे पत्रकारांशी संवाद साधत एक खळबळजनक विधान केले.
अजित पवारांचे पत्रकारांशी मिश्कील संभाषण
या कार्यक्रमादरम्यान, अजित पवार यांनी पत्रकारांशी संवाद साधताना मिश्कील लहजात एक वक्तव्य केले. “आम्ही दोघे (मुख्यमंत्री आणि उपमुख्यमंत्री) तर सगळ्यांना उडवून टाकू,” असे म्हणत त्यांनी उपस्थितांना एक क्षणभर आश्चर्यात टाकले. यानंतर, “नीट महायुतीच्या बातम्या द्या नाहीतर बघा,” असे म्हणत त्यांनी पत्रकारांशी हलक्या-फुलक्या शब्दांत संवाद साधला. त्यांच्या या वक्तव्यावर उपस्थितांमध्ये हशा पिकला.
अजित पवार हे नेहमीच आपल्या थेट आणि मिश्कील भाषणशैलीसाठी ओळखले जातात. त्यामुळे त्यांच्या या विधानाला राजकीय संदर्भात न घेता, केवळ हलक्या फुलक्या वातावरणात केलेले विनोदाचे स्वरूप असल्याचे बोलले जात आहे. (Ajit Pawar)
महायुतीतील घटक पक्षांसाठी महत्त्वाचा प्रसंग
या कार्यक्रमाला महायुतीतील प्रमुख नेते उपस्थित असल्याने, हा औद्योगिक प्रकल्प महायुतीच्या यशाचा एक भाग मानला जात आहे. महाराष्ट्रात औद्योगिक क्षेत्रात मोठ्या गुंतवणुकीला चालना मिळावी, या उद्देशाने राज्य सरकार सातत्याने प्रयत्नशील आहे. चाकण औद्योगिक वसाहतीत सुरू झालेला हा अत्याधुनिक मिसाईल्स आणि स्मॉल आर्म्स कॉम्प्लेक्स भविष्यात संरक्षण क्षेत्रात मोठे योगदान देईल, असे मानले जात आहे.
या उद्घाटन सोहळ्यानंतर अजित पवारांच्या या विधानाची चर्चा सुरू झाली असून, सोशल मीडियावर याबाबत वेगवेगळ्या प्रतिक्रिया उमटत आहेत. त्यांच्या या वक्तव्याचा व्हिडिओ देखील प्रचंड व्हायरल होत आहे. (Ajit Pawar)
Title: Ajit Pawar Witty Remark Sparks Laughter
