Agristack | केंद्र सरकारने शेतकऱ्यांना शासकीय योजनांचा फायदा मिळवून देण्यासाठी ‘अॅग्रिस्टॅक’ (Agristack) नावाची एक नवी प्रणाली सुरू केली आहे. यामध्ये जमीनमालकांची माहिती आधार नंबर आणि मोबाइल नंबरच्या आधारे एकत्र केली जात आहे, ज्यामुळे खऱ्या शेतकऱ्यांना सरकारी योजनांचा लाभ मिळणार आहे. याचा एक मोठा फायदा म्हणजे शेतजमिनींच्या खोट्या दाखल्याद्वारे जमिन खरेदी करणाऱ्या धनदांडग्यांच्या बेनामी मालमत्तेवर टाच येणार आहे.

अॅग्रिस्टॅक प्रणाली आणि शेतकऱ्यांना होणारे फायदे

केंद्र शासन आणि महाराष्ट्र शासन यांच्या संयुक्त विद्यमाने महाराष्ट्रात ‘अॅग्रिस्टॅक’ उपक्रम सुरू झाला आहे. २१ जानेवारी 2025 च्या आदेशानुसार यासाठी विशेष कॅम्प आयोजित केले जात आहेत. शेतकरी, त्यांची जमीन, हंगामी पिके, आणि शेताचे भौगोलिक स्थान याबाबतची माहिती एकत्र केली जात आहे. यामुळे शेतकऱ्यांची ओळख ‘फार्मर आयडी’ म्हणून निश्चित केली जाईल. यामुळे शेतकऱ्यांना शासकीय योजनांचा फायदा सहजपणे मिळवता येईल.

या प्रणालीमुळे सरकारला देशातील कुणाकडे किती जमीन आहे याची सर्व माहिती मिळणार आहे. पॅन कार्ड, आधार नंबर, बँक अकाउंट, जमीन मालकी, इन्कम टॅक्स आणि जीएसटी यासारख्या महत्वाच्या माहितीच्या विश्लेषणामुळे बोगस शेतकऱ्यांचा शोध घेणे आणि त्यावर नियंत्रण ठेवणे शक्य होईल. यामुळे खऱ्या शेतकऱ्यांचे हित साधले जाईल आणि बोगस व्यवहारांचा पर्दाफाश होईल. (Agristack)

शेतजमीनांच्या खरेदी विक्रीवरील नियंत्रण कडक होणार

केंद्र सरकारने कंपन्यांसाठी ‘DIN (Director Identification Number)’ ऑनलाईन प्रणाली सुरू केली होती, ज्यामुळे कंपन्यांची माहिती आणि त्यांचे कामकाज तपासले जात होते. त्याच पद्धतीने आता सरकार शेतजमिनीच्या बाबतीत सुधारणांची सुरुवात करत आहे. अॅग्रिस्टॅक प्रणालीच्या माध्यमातून सरकार शेतजमिनींच्या मालकीच्या आणि खरेदीच्या माहितीचा व्यवस्थित तपास करेल, आणि शेतजमीनांच्या खरेदी विक्रीवरील नियंत्रण कडक करेल.

फार्मर आयडीचे फायदे

प्रधानमंत्री किसान सन्मान निधीचा लाभ मिळवणे सोपे.
हवामान अंदाज, मृदा आरोग्य तपशील आणि योग्य पीक सल्ला मिळवणे.
पीक विमा योजनेचा लाभ.
डिजिटल पीक कर्ज मिळवणे सोपे.
कृषी अनुदान उपकरणे खरेदीसाठी सुलभता. (Agristack)

Title : Agristack System Launched to Benefit Farmers and Tackle Fake Ownership