Abhishek Ghosalkar | शिवसेना (ठाकरे गट) (Shiv Sena Thackeray group) नेते दिवंगत अभिषेक घोसाळकर (Late Abhishek Ghosalkar) यांच्या हत्या प्रकरणातील प्रमुख साक्षीदार लालचंद पाल (Lalchand Pal) आणि अभिषेक यांच्या पत्नी तेजस्वी घोसाळकर (Tejaswi Ghosalkar) यांना जीवे मारण्याची धमकी (Death Threat) देण्यात आल्याचा धक्कादायक प्रकार समोर आला आहे. एका व्हॉट्सॲप ग्रुपवर (WhatsApp Group) आलेल्या धमकीच्या संदेशानंतर लालचंद पाल यांनी पोलिसांत (Police) धाव घेत तक्रार दाखल केली आहे. या प्रकारामुळे मुंबईत (Mumbai) पुन्हा एकदा खळबळ उडाली आहे.
व्हॉट्सॲप ग्रुपवरील धमकीचा संदेश
लालचंद पाल हे शिवसेना (उद्धव बाळासाहेब ठाकरे) पक्षाचे कार्यकर्ते असून, ते शाखा क्रमांक १, गणपत पाटील नगर येथे कार्यालय प्रमुख म्हणून कार्यरत आहेत. दिवंगत अभिषेक घोसाळकर यांचे ते निकटवर्तीय सहकारी होते आणि ८ फेब्रुवारी २०२४ रोजी ज्यावेळी अभिषेक यांची फेसबुक लाईव्ह दरम्यान हत्या करण्यात आली, तेव्हा लालचंद पाल हे घटनास्थळी त्यांच्यासोबतच उपस्थित होते. त्यामुळे ते या हत्या प्रकरणातील अत्यंत महत्त्वाचे प्रत्यक्षदर्शी साक्षीदार (Eyewitness) आहेत.
लालचंद पाल यांनी पोलिसात दिलेल्या फिर्यादीनुसार, १ एप्रिल २०२५ रोजी ‘गरीब नवाज नियाज कमिटी’ नावाच्या व्हॉट्सॲप ग्रुपवर ‘शरीफ’ नावाच्या एका सदस्याने एक आक्षेपार्ह मेसेज पोस्ट केला. या मेसेजमध्ये अभिषेक घोसाळकर यांचा फोटो वापरून त्याखाली इंग्रजीमध्ये “Lalchand inko Dekhkar Sudhar Ja, Isko biwi ko mat marva dena Lalchand” (लालचंद, यांना पाहून सुधार, हिच्या (अभिषेकच्या) पत्नीला मारवू देऊ नकोस लालचंद) असा मजकूर लिहिण्यात आला होता. पाल यांचा मित्र रियाज (Riyaz), जो त्या ग्रुपचा सदस्य आहे, त्याने २ एप्रिल रोजी हा मेसेज पाहिला आणि तात्काळ पाल यांना याबाबत माहिती दिली. पाल यांच्या म्हणण्यानुसार, हा संदेश म्हणजे त्यांना आणि तेजस्वी घोसाळकर यांना दिलेली जीवे मारण्याची धमकी आहे. हा मेसेज नंतर ग्रुपमधून डिलीट करण्यात आला.
Abhishek Ghosalkar | लालचंद पाल यांची पोलीस तक्रार
आपल्या जीवाला धोका असल्याचे लक्षात आल्यानंतर लालचंद पाल यांनी तात्काळ पोलीस ठाण्यात धाव घेत याप्रकरणी कायदेशीर फिर्याद (FIR) दाखल केली आहे. त्यांनी आपल्या फिर्यादीत ‘शरीफ’ नावाच्या व्यक्तीविरोधात जिवे ठार मारण्याची धमकी दिल्याप्रकरणी कारवाई करण्याची मागणी केली आहे. तसेच, ‘गरीब नवाज नियाज कमिटी’ या व्हॉट्सॲप ग्रुपचे ॲडमिन असलेल्या मोहम्मद हबीब वलीउल्ला सुलेमानी (Mohammed Habib Waliullah Sulemani) आणि आबीद कासीम शेख (Abid Kasim Shaikh) यांची नावेही त्यांनी नमूद केली आहेत.
अभिषेक घोसाळकर यांच्या हत्येला एक वर्ष उलटून गेले असले, तरी या प्रकरणातील साक्षीदाराला अशा प्रकारे धमकी मिळणे, हे अत्यंत गंभीर आहे. पोलिसांनी या प्रकरणाची नोंद घेतली असून, धमकीचा मेसेज कोणी आणि कोणत्या उद्देशाने पाठवला याचा तपास सुरू केला आहे. या धमकीमागे कोण आहे आणि त्याचा घोसाळकर हत्या प्रकरणाशी काही संबंध आहे का, हे पोलीस तपासात उघड होईल.
