Aadhaar card Update | आधार कार्ड हे प्रत्येक नागरिकाचं ओळखपत्र आहे आणि जवळपास सगळ्या कामांसाठी आधार कार्ड आवश्यक आहे. ऑक्टोबर 2025 पासून आधार कार्डसंबंधित काही नियमांमध्ये बदल करण्यात आला आहे. आधार कार्ड बनवून जर 10 वर्षे पूर्ण झाली असतील, तर ते अपडेट करणे आता अनिवार्य आहे. प्रत्येक भारतीय नागरिकासाठी आधार कार्डवर एक 12 आकडी अनन्य नंबर (unique number) दिलेला असतो. 1 ऑक्टोबरपासून आधार कार्डच्या नियमांमध्ये बदल करण्यात आले आहेत. (Aadhaar card Update)
माहितीतील बदल कोणते? :
लागू झालेल्या नवीन नियमांनुसार, जुने कार्ड अपडेट करणे, कार्डवर वडिलांचे किंवा पतीचे नाव हटवणे, पत्ता, जन्मतारीख यासंबंधित अनेक बदल केले गेले आहेत. आता जर तुम्हाला आधार कार्डमध्ये काही बदल करायचा असेल, तर नवीन अपडेट प्रक्रियेनुसार करावे लागणार आहे. त्याचबरोबर आधार अपडेट करण्यासाठी घेतले जाणारे शुल्क आणि त्यावर दिसणारी माहिती या दोन्ही गोष्टींमध्ये बदल होतील.
5–7 वयोगटातील लहान मुलं आणि 15–17 वयोगटातील किशोरवयीन मुलांना बायोमेट्रिक अपडेटसाठी शुल्क लागणार नाही. पूर्वी यासाठी 50 रुपयांचे शुल्क होते, जे आता माफ केले गेले आहे. या वयोगटासाठी अपडेट आवश्यक आणि अनिवार्य आहे. अपडेट न केल्यास आधार कार्ड अवैध ठरू शकते.
Aadhaar card Update | वडिलांचे/पतीचे नाव:
15 ऑगस्ट 2025 पासून नवीन आधार कार्डवर 18 वर्षे किंवा त्यापेक्षा मोठ्या वयाच्या लोकांसाठी आधार कार्डवर वडिलांचे किंवा पतीचे नाव दिसणार नाही. UIDAI च्या रेकॉर्डमध्ये ही माहिती राहील. या बदलामुळे आता सतत नाव बदलण्याची गरज नाही आणि नागरिकांची प्रायव्हसी देखील सुरक्षित राहील. महिलांसाठी हा सकारात्मक बदल आहे.
आधार कार्डवर आता जन्मतारीख फक्त वर्षाच्या स्वरूपात दिसेल. UIDAI च्या रेकॉर्डमध्ये पूर्ण जन्मतारीख राहील. पण कार्डवर फक्त नाव, वय आणि पत्ता दिसणार आहे. त्याचबरोबर 1 ऑक्टोबर 2025 पासून पत्ता बदलण्याची प्रक्रिया डिजिटल होणार आहे. uidai.gov.in किंवा mAadhaar ॲपवरून रिक्वेस्ट सबमिट करून जवळच्या आधार केंद्रावर डॉक्युमेंट व्हेरिफाय करू शकता. त्यानंतरची प्रक्रिया ऑनलाईन केली जाईल.
अपडेटसाठी नवीन शुल्क किती?
-
नाव किंवा पत्ता यांसारख्या सामान्य सुधारणा असल्यास 75 रुपयांचे शुल्क तुम्हाला मोजावे लागेल.
-
बायोमेट्रिक माहिती म्हणजेच फिंगरप्रिंट किंवा फोटो बदलायचा असेल तर 125 रुपयांचे शुल्क लागेल.
- नवीन आधार कार्ड बनवण्यासाठी कोणतेही शुल्क नसेल; ते पूर्णपणे मोफत असणार आहे.
