8th Pay Commission | दिवाळीनंतर केंद्र सरकारकडून कर्मचाऱ्यांसाठी एक मोठी आनंदवार्ता येण्याची चिन्हे दिसत आहेत. 8 व्या वेतन आयोगाच्या प्रक्रियेतील अडथळे दूर होण्याची शक्यता वर्तवली जात आहे. या निर्णयामुळे देशभरातील सुमारे 1 कोटी केंद्रीय कर्मचारी आणि पेन्शनधारकांना फायदा होणार आहे.
सरकारने वर्षाच्या सुरुवातीलाच 8 व्या वेतन आयोगाची घोषणा केली होती, मात्र प्रत्यक्ष प्रक्रिया सुरू न झाल्याने कर्मचारी नाराज होते. आता मात्र सरकार दरबारी या प्रक्रियेला गती देण्यात येत असून, लवकरच अधिसूचना प्रसिद्ध होण्याची अपेक्षा आहे.
नोव्हेंबरपर्यंत अधिसूचना शक्य; नियम आणि अटी ठरवण्याचे काम सुरू :
सरकारने 8 व्या वेतन आयोगासाठी आवश्यक नियम, अटी आणि शर्ती तयार करण्याचे काम सुरू केले आहे. माध्यमांनुसार नोव्हेंबर 2025 पर्यंत यासंबंधी अधिसूचना जारी केली जाऊ शकते. कर्मचारी संघटनांकडून वाढत्या दबावामुळे सरकार या विषयावर जलदगतीने निर्णय घेत आहे.
7 व्या वेतन आयोगाचा कालावधी 31 डिसेंबर 2025 रोजी संपणार असल्याने, त्याआधीच नवीन आयोगाच्या गठनाबाबत निर्णय होण्याची शक्यता आहे. अर्थराज्यमंत्री पंकज चौधरी यांनी स्पष्ट केले आहे की सरकार या विषयावर सक्रियपणे काम करत आहे आणि योग्य वेळी अधिसूचना जारी केली जाईल.
8th Pay Commission | नवीन आयोग कधी लागू होणार? :
8 वा वेतन आयोग गठित झाल्यानंतर सरकार पुढील 3 ते 9 महिन्यांच्या कालावधीत त्याची समीक्षा करेल. 7 वा आयोग फेब्रुवारी 2014 मध्ये स्थापन होऊन 2015 मध्ये त्याचा अहवाल सादर झाला होता. त्याच पद्धतीनुसार, जर नोव्हेंबरमध्ये 8 व्या आयोगाची घोषणा झाली, तर एप्रिल 2027 पर्यंत अहवाल आणि जुलै 2027 मध्ये अंमलबजावणीची शक्यता आहे.
या आयोगाचा लाभ सुमारे 50 लाख केंद्रीय कर्मचारी आणि 65 लाख निवृत्त कर्मचाऱ्यांना मिळणार आहे. संरक्षण क्षेत्रातील कर्मचाऱ्यांनाही या आयोगाचा फायदा होईल. यामुळे पगारात मोठी वाढ होण्याची शक्यता आहे.
कर्मचाऱ्यांसाठी वाढीव पगार आणि थकबाकीची आशा :
सरकारकडून पुढील वेतन आयोग लागू होईपर्यंतच्या जानेवारी 2026 ते जून 2027 या 18 महिन्यांच्या थकबाकीची मागणीही कर्मचाऱ्यांनी केली आहे. जर फिटमेंट फॅक्टर 2.86 धरला गेला, तर कर्मचाऱ्यांच्या पगारात मोठी वाढ होईल.
उदाहरणार्थ, एका चपराशाचा पगार सुमारे ₹33,480 ने वाढू शकतो, आणि या 18 महिन्यांच्या थकबाकीतून ₹6,02,640 रुपयांचा अतिरिक्त लाभ मिळू शकतो. त्यामुळे कर्मचाऱ्यांच्या हातात मोठा आर्थिक फायदा होईल आणि बाजारपेठेतही चलनवाढीचा परिणाम जाणवेल.
